17. kolejka z perspektywy ślōnskich klubōw miała być przede wszyjskim okazjōm na chycyni lidera w wykōnaniu Górnika, jak tyż szansōm na rehabilitacjo drużyn Ruchu i Piasta. Szczególnie ci piyrsi mieli co udowadniać swoim kibicōm, po tym jak narobiyli se niy mało gańby w szpilu z Lechym.
Już w sobota nabrali my trocha smakōw, bo punkty potraciyła zaś mianowano już bez wiynkszość szpecōw ,,mistrzym" Legia. Na szczynści piniōndze niy grajōm. Jedynostka gwiazdorōw niy poszalała w Bełchatowie (0:0), beztōż reszta ligi raczyj wartko gry o korōna niy odpuści... Zdo sie, że zaś wszyscy bydōm musieli tyrać do kōńca.
CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL
Spamiyntany Ruch klupie kamratōm
Tydziyń tymu kibicōm Niebieskich płaczki mōgły ciś sie już do oczōw. Porażka 0:4 z Lechym wyglōndała rychtyk szpetnie. Fusbaliści coby pokozać, że jednak sōm coś we werci musieli bez godki w kamrackim szpilu z Widzewym zapunktować. Trocha nadziei na poprawa doł rozgrywany na beztydziyń pucharowy szpil z Zagłębiym Lubin (2:2 na wyjeździe). Teroski miało być jeszcze lepij.
W piyrszych minutach to jednak Widzew zdoł sie groźniejszy. Piyrszym sygnałym do ,,Niebieskich" coby dać se pozōr bōł szlag Brozia z biydōm obrōniōny bez Peskovicia. Niyskorzij w 15. minucie na sōm na sōm wyloz Mariusz Stępiński. Grocz Widzewa jednak ewidyntnie zawaloł ta rychtyk dobro okazjo. Próba zmieszczynio bala miyndzy nogami tormana była durś niyudano.
To jes fusbal i taki coś musi sie zymścić. Dwie minuty niyskorzij bal na prawe skrzidło dostowo Jankowski. Podlatuje ś nim i jeszcze pora dobrych metrōw przed szesnostkōm decyduje sie na szlag po długim słupku. Bal robi bramkorza za błozna. Odbijo sie przody od zola, a niyskorzij od słupka i wpaduje do siatki. 1:0. Od tego mōmyntu gra Widzewiokōw durś sie rozłōnaczyła i Ruch zdowoł sie kōntrolować sytuacjo.
Na kōńcowy wynik niymały wpływ musiała mieć tyż akcjo z 41. minuty. Mōmy bal zagrany z głymbi pola i zawodnika Ruchu, kiery leci go opanować, co postawiyłoby go w idyalnej sytuacji, bo placu miołby w pierōny, a drōga do bramki czysto. Do tego jednak niy pozwoli dopuścić bramkorz z Łodzi, kiery oroz niy wiadōmo skōnd znojdzie sie fōrt za 30-tym metrym od swojij bramki i zahoczy bal rynkōm. Czerwōno kartka. Dragojević podpod niy yno syndzimu, ale tyż swoimu trynerowi, kiery z tego co pedzioł po meczu, chyba bydzie w nojbliższym czasie testowoł inkszych tormanōw.
W drugij połowie przewoga ,,Niebieskich" była już ewidyntno. Blisko gola nasi byli po ziyńczukowej cyntrze z roga. Na piōntym metrze mielimy wtedy niezły miszōng. Szlag głowōm, dobitka i słupek. Blisko szczynścio bōł Lewiński.
Hneda doczekōmy sie jednak bramki na 2:0. Po bezsynsownym faulu na Starzyńskim, elwra na gola pewnie zamiyni były fusbalista krakowskij Wisły, Marek Zieńczuk.
Niyskorzij widzielimy jeszcze pora dobrych okazji Ruchu, na kiere Widzew poradziōł odpedzieć yno nastympnym niyudanym dō nich pojedynku oko w oko miyndzy Stępińskim, a Peskoviciym.
Ruch zasłużōł na jeszcze jednego gola, kiery stoł sie faktym już w doliczōnym czasie gry. Wtedy to bohatyr piyrszej bramkowej akcji, Jankowski, elegancko w tympo zgroł bal do Migdaugasa Panki. Piykny, mocny szlag, trefio gynał pod słupek. Siatka praje wytargano i było grocz ekipy z Łodzi cieszy sie z ustalynio wyniku na 3:0.
Ruch utrudnio zadani strefie spadkowej. Podbeskidzie i Bełchatōw bydōm miały biyda pozbiyrać sie z tej dziury. Ich strata to już odpowiednio 9 i 10 punktōw (przed meczym Podbeskidzia).
CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL
Syndrōm Górnika
PIAST GLIWICE - ZAGŁĘBIE LUBIN 1:1 ZOBACZ ZDJĘCIA
Spotkani w Gliwicach miało uspokoić kibicōw Piasta, po przegranym szpilu z Górnikym, kierego chyba za fest niy lubiōm. Po spotkaniu z rywalym zza miedzy obcisło sie nawet ich trynerowi Dariuszowi Dudkowi za to, że kulturalnie pogratulowoł przeciwnikōm i winszowoł gry w europejskich pucharach. W sobotnim szpilu humory kibicōm Piasta w pewnym synsie zaś mioł popsuć Górnik...
W szpil lepij wleźli goście. Lubin na poczōntku mioł wiyncyj dobrych okazji i tak tyż miała wyglōndać praje cołko piyrszo połowa. Już w 3. minucie w szparze miyndzy dwōma obrōńcami bal dostowo Papadopulos i jes teoretycznie sōm na sōm. Tak rychtyk presja obrōńcōw jednak trocha mu zawadzo, skuli czego niy trefio czysto w bal.
Z czasym coroz wiyncyj do godki mo Lubin. Aktywny jes Robert Jeż. Goście co chwila prubójōm szlagōw z dystansu, jednak bez wiynkszych skutkōw. Na to wszyjsko Piast w piyrszej czynści szpilu poradzi odpedzieć yno szlagiym głowōm Rubena Jurado, po kierym w kōńcu ciepnōnć mōg sie bramkorz gości.
Po przerwie to jednak Piast bajsnōł jako piyrszy. W 57. minucie do bala dolatuje Jurado. Obrōńca gości wyprzedzo go, ale po jego interwyncji bal odbijo sie od klaty Hiszpana, kiery leci za nim i jeszcze przed liniōm kōńcowōm zagrywo po zolu do środka. Tamek akcjo płaskim szlagiym kōńczy Docekal. Czech wrażo bal juz do praje pustej bramki i Piast kludzi 1:0.
Po zdobyciu gola mōmy okres trocha żywszej gry Piasta, ale ostatni słowo noleży do gości. Gol na wyrownani w doliczōnym czasie gry bydzie zasługōm byłych fusbalistōw... Górnika Zabrze. Z roga dobrze cyntruje Jeż, a w szesnostce elegancko uwalnio sie Banaś, kiery znojduje se na tela dużo placu, że bez problymu może pokierować głowōm bal pod lata.
Syndrōm Górnika trwie. Piast zdobywo yno i aż 1 punkt. Tradycyjnie znojdymy go w środku tabeli, na 7 placu. W tym sezōnie spadek, ani podium już im chyba niy bydōm grozić.
CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL
Zawalōno szansa
GÓRNIK ZABRZE - JAGIELLONIA 1:2 ZOBACZ ZDJĘCIA
Nadzieje przed niedzielnym spotkaniym na placu budowy przi ulicy Roosvelta były doprowdy wielki. Legia w dwóch piyrszych szpilach wiosny upolowała yno 1 punkt. Wojkowym trocha popsuły sie flinty i to trza było wykorzystać. Zwyciynstwo pozwolyłoby Górnikowi zrownać sie z liderym. Rozklupano ostatnio bez Podbeskidzie Jaga okozała sie jednak niy tak łatwym przeciwnikiym.
Hajto tym razym lepij poukłodoł defynsywa Jagi tak, że Górnik mioł biyda coś wyczarować w swoich atakach. Szpil pokuloł sie w piyrszej połowie do synkōw z Zabrzo darymnie...
Już w 9. minucie Jaga wygrywo, chocioż ewidyntnie bez cufal. Szlag Quintany próbuje zatrzimać Danch, ale bal tak szpetnie odbijo sie od jego nogi i zmiynio tor lotu, że chycōny na wykroku Skorupski niy poradzi nic już zrobić. Bal w siatce i 0:1. Borok tryner niy wiy ani kogo za strata gola sprzezywać. Zostowo yno cicho zapierōnić pod nosym.
3 minuty niyskorzij groźny szlag z ostrego kōnta oddowo Plizga, a bal yno trocha mijo słupek bramki Górnika. Gospodorze teroski chyba dłużij utrzimujōm sie przi balu, ale Jaga sztyjc jes groźniejszo pod bramkōm.
W 26. minucie fajny bal za obrōna dostowo Wojciech Łuczak. Napastnik Górnika piyknie opanowuje futbolōwka. Niystety jego lob, kiery kōńczy sie w siatce, niy prziniesie nōm gola. Jes spolōny i syndzia leci spamiyntać Łuczaka za gra po gwizdku.
W 30. minucie sytuacjo gospodorzy wyglōndo jeszcze gorzij. Po mocnej cyntrze z wolnego bal spaduje na głowa Adama Dźwigały, za chwila odbijo sie od słupka i lōnduje w bramce. 0:2.
Dopiyro strata drugij bramki do porzōndku ruszyła ofynsywōm Górnika. W 33. minucie uaktywniōł sie Olkowski. Skrzidłowy z Zabrzo zafyrloł balym pod swoimi nogami tak, że obrōńcy yno sie podziwali i na wolny plac wypuszczōny zostoł grocz w biołej koszulce Trójkolorowych. Bal mocno wkopniynty do środka zatrzimuje niystety bramkorz. Po trzech minutach tyż na prawej strōnie gupnie Bemben. Dynamiczno akcjo tego grocza, kōńczy sie dobrōm cyntrōm, po kierej arbiter odgwizduje jednak faul w ataku i Górnik sztyjc zostowo bez porzōndnego szlagu.
Nojlepszo okazjo piyrszej połowy nasi mieli w 38. minucie. Bal wciepniynty z autu głymboko w szesnostka wybijo jedyn z obrōńcōw. Futbolōwka spaduje jednak na siōdmy meter, kaj do piyknego woleja skłodo sie Kwiek. Bal furgnie gynał pod słupek, ale dobro parada zaliczo bramkorz. Do szatni złażymy beztōż przi stanie 2:0 do gości.
Drużyna, kiero w tym szpilu miała walczyć o fotel lidera ni mōgła tak wczas dać se pokój i niy walczyć. Kibice yno czekali aż w drugij połowie Górnik ciepnie sie do ataku. W piyrszych minutach w ofynsywnych próbach Górnika, sztyjc jednak czegoś brakowało...
Dopiyro kaś po godzinie gry akcje na połowie przeciwnika zaczyły sie lepij kleić. Fest blisko zdobycio gola bōł wkludzōny po przerwie Sergiej Mosznikow. W 72. minucie dobrze wyloz do bala zagranego za obrōńcōw, opanowoł go klatōm i przeciepoł nad bramkorzym. Już widzielimy bal w bramce, ale w dobrym placu o dobrej porze po roz drugi w tym szpilu znod sie Adam Dźwigała i tym razym wybiōł futbolōwka z linii bramkowej.
Udało sie dopiyro 9 minut przed kōńcym regulaminowego czasu. Długi bal zagrany z wolnego przez Gancarczyka puklym zgrywo Bonin, a elegancko zza szesnostego metra przimierzo Przybylski. Bal odbijo sie po drodze pora razy od zola i trefio tam kaj trza, pod lewym słupkiym.
Teroski ni mōgło to już inaczyj wyglōndać. Górnik ciepnōł wszyjski siyły do ataku. Brakło jednak czasu, pōmysłu i chyba tyż Prezesa Nakoulmy. Gościōm ciepło zrobiyło sie napewno przi wciepniynciu z autu w ostatnij minucie doliczōnego czasu, kej na piōntym metrze szkopyrtkōm próbowoł szczylać Bonin. Bal pofurgnōł jednak nad latōm.
Po ptokach. Ni mōmy jednak lidera, chocioż była ku tymu dobro okazjo. Przody Lech, potym Legia i teroski Górnik. Wszyjscy tracōm punkty. W tej kolejce wiyrch tabeli zagroł tak jak w kōńcōwce ostatnigo sezōnu, kej mvmyntami zdało sie, że żodyn niy chce tego mistrzostwa. Grōmy dalij...
Grzegorz Buchalik
CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL
*Slash w Katowicach! Spodek oszalał [SENSACYJNE ZDJĘCIA i WIDEO]
*Hajmat, hanysy, gorole, powstania śląskie, godka! [Śląski Słownik Pojęć Kontrowersyjnych]
*Ranking szkół nauki jazdy 2013
*Poznaj tajemnicę abdykacji papieża Benedykta XVI
Dołącz do nas na Facebooku!
Publikujemy najciekawsze artykuły, wydarzenia i konkursy. Jesteśmy tam gdzie nasi czytelnicy!
Dołącz do nas na X!
Codziennie informujemy o ciekawostkach i aktualnych wydarzeniach.
Kontakt z redakcją
Byłeś świadkiem ważnego zdarzenia? Widziałeś coś interesującego? Zrobiłeś ciekawe zdjęcie lub wideo?