Nasza Loteria SR - pasek na kartach artykułów

Buchalik: Ślonski fusbal. Relacje piłkarskie po śląsku

Ślonski fusbal
Mo sie ku zimie. Hneda w telewizorze czynścij niż tormański parady i gole szczylane szkopyrtkom, bydymy podziwiać czerwono ciynżarowka, kiero rajzuje przi dobrze wszyjskim znanym szlagrze ,,Coraz bliżej święta". Na dworze jes coroz bardzij szpetnie... Nasi fusbaliści muszom jednak jeszcze trocha potyrać po murawie niż pódom na urlopy. Liga sztyjc kulo sie do przodku i niy przestowo być ciekawo, beztoż kibice niy przestowajom przichodzić na stadiony. Trza sie yno pomału zaczonć wyposażać w rynkawiczki, czopki i spodnioki. Chyba, że szpile oglondo sie w doma pod pierzinom z pilotym w rynce. A jes na co sie dziwać...

Ekstraklasa

Na rewirze

Niebieskim chyba rychtyk fest brakuje kontuzjowanych snajperow. Arkadiusz Piech dopiyro pomału wraco do gry, a na rewirze sztyjc jes Andrzej Niedzielan. Efekt jes taki, że w piontek ni mioł kto klupać bramek do Ruchu. Niy yno na tej pozycji były jednak problymy kadrowe. Skuli kontuzji ni mogli zagrać tyż m. in. Łukasz Janoszka, Marek Zieńczuk, Gabor Straka i Marek Szyndrowski. Tryner Lechii ni mioł wcale łatwiejszego zadanio z poskłodaniym piyrszej jednostki. Tamek tyż doś trocha groczow mo rewir. W sumie przed piontkowym szpilym wymigało sie na ,,L4" aż 14 groczy obu ekip. Na Cichej lepij z tej sytuacji wyleźli grocze z Gdańska, kierzi skromnie pokonali naszych 1:0. Bal wpod do siatki dopiyro 4 minuty przed końcym szpilu.

Piyrszo połowa niy noleżała do nojciekawszych, ale było widać że to goście bardzij cisnom na brama Peskovicia. Efektu niy było jednak z tego żodnego. Za to po drugij stronie boiska bal w bramce zmieścioł Grzegorz Kuświk. Niystety, momy spolonego.

Po przerwie szpil sie trocha rozfechtowoł obie ekipy mogły otworzyć wynik spotkanio. Niyskorzij do ataku ciepnoł sie Ruch. Niy pomog im jednak ani Piech, wkludzony na boisko w 56. min, kiery szczyloł niystety wele bramki. Akcjo meczowo rozegrała sie w 86. min. Goście wykludzajom wtedy kontra, kiero skutecznym szlagiym kończy młody Kacper Łazaj.
Ruch przegrywo na swoim stadionie piyrszy ligowy szpil od 29 paździyrnikia 2011 roku. W pyńdziałek znojdymy go w tabeli kaś wele 10. placu.

Mistrz Polski rozklupany

Po sztyrech przegranych szpilach spamiyntali sie fusbaliści Piasta. Byniaminek zaaplikowoł Śląskowi Wrocław 3 skutyczne szlagi, kiere przesondziły o końcowym wyniku.

Zaczyło sie niynojlepij. W 29. min. obecny reprezyntant Polski, Waldemar Sobota cyntruje bal do byłego reprezyntanta, Sebastiana Mili, kiery głowom wrażo bal do siatki i jes 1:0. Na 5 minut przed przerwom momy wyrownani. Przi tym golu zaś ,,zasłużoł sie" Sobota. Idzie nawet w cudzysłowie pedzieć, że mo drugo asysta. Dyć po jego zagraniu rynkom syndzia zarzondzo elwer, kiery pewnie wykorzystuje Wojciech Kędziora. Hneda Piast już wygrywo. Bramka do szatni w 44. minucie zdobywo Ruben Jurado.

W drugij połowie Piast mondrze sie bronioł. Fusbaliści z Gliwic grali wysokim pressingiym i wykludzali groźne kontry. Dobrze chytoł tyż ich torman, Trela, kierejo gospodorze za pierona niy umieli pokonać. Kibice obejrzeli w tym szpilu jeszcze yno jedna bramka, kiero ustaliła wynik na 3:1 do gości. Tego gola tyż mo na sumiyniu Sobota. Borok zaliczoł tym razym ausdruka, po kierym do bramki trefio Damian Zbozień.

Szpetno seria została przerwano i to w szpilu z Mistrzym Polski. To musi do porzondku poprawić morale ,,Piastunkow", kierzi zostanom po tej kolejce na 9. pozycji.

*Wyszedł ze szpitala i zmarł. Zwłoki znaleziono po roku 35 m od szpitala
*Euforia na koncercie Kultu w Spodku [ZDJĘCIA i WIDEO]
*Zmiana opon na zimowe obowiązkowa. ZOBACZ GDZIE i DLACZEGO

Codziennie rano najświeższe informacje z woj. śląskiego prosto na Twoją skrzynkę e-mail. Zapisz się do newslettera

Niy poszli za ciosym

Podbeskidzie wygrało tydziyń tymu swoj piyrszy szpil. ,,Dostali kopa" i ich kibice liczyli tera na to, że drużyna nabiere szwongu. Niystety wyhamowoł ich były Groclin i niydoszło GieKSa, czyli tak rychtyk: Polonia Warszawa. W Bielsku-Białej momy 1:0 do gości.

Na spomnianym szwongu gospodorze szpil zaczyli. W piyrszych minutach to oni przewożali. Były tyż próby pokonanio Przyrowskigo. Ireneusz Jeleń szczyloł jednak ,,kole a wele". Niyskorzij zaczły sie tyż okazje gości, kierzi w drugij połowie już wyraźnie mieli wiyncyj z gry. W 47. minucie ,,Czorne koszule" dostały nawet elwer. Słaby szlag Pawła Wszołka z jedynostego metra obronioł na szczynści bez problymu Zajac.

Jedyny gol spotkanio oglondomy w 66. minucie. Przody na bramka klupnoł Dorde Cotra, ale bal poradzioł odbić torman Podbeskidzia. Teroski robi sie mały miszong. Baszczyński zgrywo bal głowom do Piątka, a tyn szczylo z piyrszej i tym razym bramkorz ni mo już nic do godki. Za chwila mogło być 0:2, ale sytuacji som na som niy wykorzystoł Dwaliszwili. Podbeskidzie mogło jeszcze wyrownać pora minut przed końcym. Po rajdzie i szlagu Jelenia bal przed sia odbioł Przyrowski, ale niystety niy było żodnego do dobitki.

Wynik już sie niy zmiynio i Podbeskidzie zostowo sztyjc z piyncioma punktami na przedostatnim placu.

Szpetno niespodzianka

W lidze ni ma już niypokonanych. W sobota piyrszy roz poległa Legia. Teroski przegrywo tyż niepokonany do tyj pory, Górnik. Niyspodzianka jes tym wiynkszo, że naszych pokonuje 14. w tabeli Zagłębie Lubin. 0:2 u sia to niy nojlepszy wynik. Trza o tym wartko zapomnieć.

Górnikom niy udało sie w niedziela włonczyć swojigo stylu gry od poczontku. W ,,maszynie" chyba pozacinały sie jakiś wichajstry i coś niy zadziałało. Katym Zabrzo boł tego dnia Szymon Pawłowski. W 23. minucie fusbalista ,,Miedziowych" wywalczoł se bal w środku pola i za chwila zaskoczoł Skorupskigo eleganckim szlagiym zza szesnostki.

W drugij połowie w końcu Górnik sie rozfechtowoł. Gospodorze prziciśli rywali, ale to jednak goście za chwila mogli klupnonć na 0:2. Okazji som na som stworzonej przez Pawłowskigo niy wykorzystoł Papadopulos. Zagłębie już yno sie broniło i czekało na kontry. Górnik jednak nijak niy poradzioł wrazić im bala do siatki. Biyda mioł nawet pod ta bramka sie przeciś. Skutycznościom za to wykozali sie goście, a konkretnie Pawłowski. Tym razym podloz do bala ustawionego przed szesnostkiym i przimierzoł gynał pod słupek. Bal odbioł sie jeszcze od zola i Skorupski mog go zaś wyciongać z siatki. Nasi nic już niy wymyślili. Idymy do szatni.

Szkoda porażki, bo szpil boł rychtyk dobrom okazjom na zbliżyni sie do Warszawiokow. Górnik jes na 4. placu i do lidera sztyjc traci yno 4 punkty. Wszyjsko przed nimi.

*Wyszedł ze szpitala i zmarł. Zwłoki znaleziono po roku 35 m od szpitala
*Euforia na koncercie Kultu w Spodku [ZDJĘCIA i WIDEO]
*Zmiana opon na zimowe obowiązkowa. ZOBACZ GDZIE i DLACZEGO

Codziennie rano najświeższe informacje z woj. śląskiego prosto na Twoją skrzynkę e-mail. Zapisz się do newslettera

I liga

Tysko seria trwie. Bytom zaś w pleca. Punktuje GieKSa

Pomału przizwyczajomy sie do tego drugoligowego schematu, w kierym wygrywajom Tychy, a sztyjc przegrywo Bytom. W ostatnij kolejce tyski byniaminek zaliczoł już czwarte zwyciynstwo z rzyndu i zaś przibliżoł sie do czołowki. Do gory w tabeli idzie tyż GKS z Katowic. Gorzij do wyglondo z perspektywy Bytomie. oni swojigo placu w tabeli niy zmiyniajom już długo.

Jako piyrszy w sobota w same połedni zaczon sie szpil w Jaworznie kaj swoji szpile rozgrywo GKS Tychy. Na pusty stadion (kibice ni mieli wstympu) przijechała Cracovia. Spadkowicz, kiery chce wartko wrocić nazot do Ekstraklasy ni mioł tym razym łatwego zadanio. Tychy okozały się wyraźnie lepsze. Potwierdzyniym tego som gole Marcina Folca (53. min.) i Macieja Mańki (76. min.). Byniaminek (4 .plac) zbliżoł sie do spadkowicza (3. plac) już yno na dystans trzech punktow.

We wieczor rozegroł sie chyba nojciekawszy szpil kolejki. Katowicko GieKSa pokonała u sia Stomil Olsztyn 4:2. Zaczyło sie co prowda od gola gości w 9. minucie, kierego klupnoł Łukasz Suchocki. Hneda jednak prziszło wyrownani. ,,Na raty" elwra wykorzystoł Przemysław Pitry. Niyskorzij w dwie minuty (29. i 31.) dwa gole Stomilowi sieknoł Deniss Rakels. Wynik 3:1 utrzimywoł sie aż do 86. minuty, kej bramka kontaktowo zdoboł Dominik Kun. Sprawa jednak wyjaśnio Deniss Rakels, kiery w 90. minucie zaliczo hat-tricka. 4:2 i Stomil jes poskłodany. Mogom pakować swoji graczki i ciś du dom.

O tyj samej porze rozgrywany boł szpil w Bytomiu. Tamek gospodorze przijmowali u sia Kolejarza Stróże. Ktoś mogby pedzieć, że Polonia Bytom utrzimuje sztyjc rowno forma. Coś w tym jes. Szkoda, że opiyro sie to na zaliczaniu porażki za porażkom. Jak synki z Bytomia nic niy zmiyniom w swojij grze, to do samego końca bydom głównym kandydatym do spadku. W tym tydniu przegrywajom yno jednym golym, ale za to punktow sie niy prziznowo. Jedyno bramka sobotnigo spotkanio klupnoł grocz gości, Krzysztof Markowski w 22. minucie. W tabeli bez zmian. Bytom ostatni.

Dołącz do nas na Facebooku!

Publikujemy najciekawsze artykuły, wydarzenia i konkursy. Jesteśmy tam gdzie nasi czytelnicy!

Polub nas na Facebooku!

Dołącz do nas na X!

Codziennie informujemy o ciekawostkach i aktualnych wydarzeniach.

Obserwuj nas na X!

Kontakt z redakcją

Byłeś świadkiem ważnego zdarzenia? Widziałeś coś interesującego? Zrobiłeś ciekawe zdjęcie lub wideo?

Napisz do nas!