Buchalik w blogu Ślonski fusbal: Ekstraklasowcy niy lebrujom

Ekstraklasowcy niy lebrujōm. Górnik na przikład poradziōł pomścić w sobota ,,Niebieskich", kierzi tydziyń tymu przegrali z Wisłōm 1:2. Synki z Zabrzo klupli Krakusōm w lidze już piōnty roz z rzyndu. Skuli tego po poru słabszych szpilach nasi nazot doskakujōm do czołōwki.

Co do Ruchu, to ōni już nastympnego dnia mōgli dać za to uciecha niy yno Zabrzu, ale nawet cołkimu Ślōnskowi i cołkij fusbalowej Polsce, bez poru dzielnic w stolicy. Tyn wyjazd do Warszawy niy bydzie jednak dobrze spōminany w Chorzowie. Zaś bez punktu.

Jeszcze gorzij prezyntuje sie sytuacjo na pograniczu ślōnsko-małopolskim, Podbeskidzie po sobotnij porażce z Pogoniōm ewidyntnie, jak to tamek godajōm: idzie, idzie. Problym w tym, że jak na razie idzie na spadek nazot do I ligi.

Ekstraklasa

Patynt na Krakusōw
Wraco nazot tyn Górnik, na kierego chcymy sie dziwać. Po trzech szpilach lekkigo wyhamowanio, w kierych nasi zdobyli yno 2 punkty, prziszło w kōńcu spamiyntani. Zaś mōgli my oglōndać wartki i dobry szpil z udziałym naszych. Wisła co prowda w tym sezōnie niy znaczy już to samo co downij, ale na dyć 3:1 do przodku w Krakowie ni może być powodym do gańby.

"Jes sobota wieczór i czas na jakąś akcję..." Tōż jadymy i to zaroski od poczōntku. Zaczyno sie dō nos "miōd, malina". Górnik wygrywo już od 8. minuty spotkanio. Fusbaliści z Zabrzo po krōtkim rozegraniu roga, dcydujōm sie w kōńcu na cyntra. Do bala wyłazi Sergei Pareiko, ale to niy bydzie nojlepszo interwyncjo tormana Wisły. Zmiynio ōn yno tor lotu futbolōwki tak, że ta spaduje gynał pod nogi Adama Dancha. Młody Hanys pewnie wykańczo akcjo i uciszo 7 000 Krakusōw (Skuli jakijś swady z klubym wiyncyj na Reymonta niy prziszło. Fanōw Górnika gospodorze w ogóle niy wpuścili, co tłumaczyli "wzglyndami bezpieczyństwa").

Zdało sie, że to Wisła przewożała w piyrszej połowie, ale gospodorze niy umieli sie jakoś wykozać pod bramkōm Skorupskigo. Nojlepszej okazji na wyrownani niy poradziōł wykorzystać Rafał Boguski. Elegancki bal zagroł mu Radosław Sobolewski. Syndzia niy zejrzoł, że bōł spolōny, bez co Boguski znod sie sōm na sōm. Jego szlag z piyrszej po zolu trefiōł jednak prosto w bramkorza.

Chwila po przerwie zaś mōg szczelić Boguski, tym razym dobre dograni po zolu dostoł od Meliksona. Zaś nic z tego ni ma. Hneda jednak bal wpaduje do siatki yno, że po drugij stronie boiska. Grubiorze zaś krótko rozgrywajōm rōg. Przi balu jes Nakoulma, kiery przedziyro sie ś nim do szesnostka przi linii kōńcowej boiska. Zatrzimać próbuje go dwóch obrōńcōw. Jedyn atakuje snajpera Górnika choby czołg, ale Prezes jakimś cudym utrzimuje sie i na nogach, i przi balu. Przi tymu jakimś cudym mijo jeszcze drugigo defynsora i wysuwo bal na szlag Mączyńskimu. Były grocz Wisły kopie tak, że bal po kōntakcie ze słupkiym znojduje sie w siatce. 2:0.

Gospodorze ciepli sie do przodku i w 60. minucie udało im sie chycić kontakt. Po cyntrze z roga i małym miszōngu bal praje na samej linii bramkowej do siatki wrażo Chavez. Zetrwały ledwo 3 minuty i mōmy odpowiydź naszych. Wartko kōntra wykōńczōł Milik w sytuacji, kierej niy szło zawalić.

Zdobywca gola na 1:3 niyskorzij zamiast bez podwyższyni wyniku wpisoł sie po roz drugi do syndziowskigo notesu skuli zgarniyncio czerwōnej kartki. Milik po gupim faulu musi iś do szatni.

W tym szpilu o zwyciynstwie zdecydowała skutyczność, kierej brakło Wiśle, a kierōm wykozoł sie Górnik. 3 punkty i 3. plac jes już w Zabrzu. Nasi tracōm tera yno 1 punkt do drugigo Lecha, kiery zebrōł baty z Wrocławiym.
Kaj ta zima?
Do fusbalistōw Podbeskidzia nojlepij byłoby kieby wszyjski boiska w Polsce zasuł już śniyg, a zōmiynta były tak pierońsko wielki, że gra w fusbal niy byłaby możliwo. Niystety trza sie jeszcze trocha pomynczyć. Podbeskidzie przegrywo tym razym z byniaminkiym ze Szczecina 0:2.

Sasal zafyrloł w tej kolejce trocha w składzie. Tym razym doł szansa zagrać od poczōntku Markowi Sokołowskimu, Dariuszowi Łatce i Kamilowi Adamkowi, jokerowi, kiery w tym sezōnie już niy roz właziōł z ławki i szczyloł gole.

Jako piyrszy bramce gospodorzy zagroziōł spōmniany już Łatka. Grocz Podbeskidzia fajnie sieknōł z wele szesnostego metra. Bal przelecioł jednak cyntymetry od prawego słupka.

W 36. minucie groźno akcjo przekludzo Pogoń. Mateusz Lewandowski wlatuje z balym w szesnostka gości i wystawio go Edimu. Po szlagu tego drugigo mōmy jeszcze jakiś rykoszet i bal furgo lekko nad latōm. Za 3 minuty Edi już sie poprawio. Doświadczōny Brazylijczyk tym razym cyntruje z roga. Po tym zagraniu bala niy siōngo Zajac, beztōż za chwila z bliskij odlygłości wynik szpilu może otworzyć Frączczak. 1:0 do gospodorzy.

Kibice, kierzi zostali w dōma doprowdy ni majom czego żałować. Drugo połowa była tak szpetno jak pogoda w tyn dziyń. Spōmnieć wypado yno 70. minuta. Cyntra Akahoshigo gynał spasowała Adrianowi Budce, kiery piyknym wolejym ustalōł wynik na 2:0.

To by było na tela. Podbeskidzie "jedzie, jedzie" w długo drōga du dōm zaś bez puntkōw i tym razym tyż bez goli. Bielsko-Biała w tabeli trzimie tera ostatni plac.

Tak niy gro wicemistrz Polski
Czorno serio sztyjc trwie. Grocze Ruchu za pierōna niy umiōm sie spamiyntać. Wszyjscy liczylimy, że udo sie wywiyź chocioż punkt z Warszawy. Niystety "Niebiescy" zrobiyli yno darymno drōga. 0:3 w pleca.

Już w 4. Minucie w sytuacji sōm na sōm znod sie Kosecki. Jednak tym razym lepszy okozoł sie jeszcze Pesković. Drugi pojedynek tych fusbalistōw wygroł już niysety Warszawiok. W 29. minucie Kosecki wykorzystoł ausdruka obrōny Ruchu. Położōł se bramkorza na zol, a niyskorzij przeciepoł nad nim bal. 1:0.

17 minut po piyrszym gwizdku drugij połowy na boisku zrobiyło sie trocha wiyncyj placu. Fusbaliści ustawiali sie w kolejce po kartki jak za kōmuny. To jednak niy były kartki na miynso. Syndzia dzielōł zaproszyniami do szatni. Poczynstowali sie Djokić i Astiz, kierzi chwila pryndzyj wdali sie w haja. Siły były wyrownane, ale lepij w nowej sytuacji znodli sie grocze Legii i za chwila tablica wyników pokozała wynik 2:0. Zdobywcōm gola zaś jes młody Kosecki.

W 74. minucie bohatyr spotkanio zaliczōł jeszcze asysta, dziynki kierej dziewiōntego gola w sezōnie zdobōł Ljuboja. Pesković bōł bez godki. Ōn jes zresztōm chyba jedynym groczym Ruchu do kierego po tym szpilu niy idzie mieć wiynkszych pretynsji.
Po szpilu tryner Zieliński dzielnie wziōn na klata czworto przegrano z rzyndu i ofyn prziznoł, że jego ekipa zagrała w tyn wieczōr darymnie. Z takōm grom ,,Niebiescy" bydōm mieli biyda wyrwać sie z dolnej czynści tabeli.

Grzegorz Buchalik
www.silesiansport.pl

CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL

*Zniewalający wystrój restauracji Kryształowa Magdy Gessler ZOBACZ ZDJĘCIA i WIDEO
*HC GKS Katowice od szatni ZOBACZ ZDJĘCIA TYLKO W DZ
*Ślązacy zazdroszczą Katalończykom autonomii: prawda czy fałsz? [CZYTAJ I SKOMENTUJ]