Tylko w DZ: Spowiedź kibola

Jo boł kibolem, tata boł kibolem, całe moje pokrewieństwo było kibolami, ale największy-mi kibolami z cołej familije boł starzik Ernst i kuzyn Lojzik łod Matildy. Nojprzod boł starzik, wielki fan Radlina, i to w latach 50. tamtego wieku, kiedy to musieli sie ze Radlinym liczyć najwiynksi.
Radlin, kiery sie nazywoł naprzod - za starej Polski - Orzeł Ema, potem za Niymca: Blau-Weis, a po wojnie Gornik, mioł kibicow od Opola aż po Cieszyn i Bielsko, i jeszcze wszyndzi kaj indzi. Żodyn jednak nie godoł - w latach kibicowanio starzika i Lojzika - inaczy jak Yma. Jeździyło sie na fuzbal na Yma, a nieskorzij godało sie na Radlin, ale nigdy nie godało sie Blau-Weis.

Jak żech już pedzioł, najwienksze tryjumfy Yma miała w tamtych 50. latach. Wtedy to też naŚlonsk zjechały werbusy z cołej Polski. Werbusy kibicowali CWKS-owi, co przeca żodyn kibic Ymy nie mog ściyrpieć, a tym bardzi rybniczanie z Gortotowic i bez to dochodziyło do bijatykow, a niy - jak godają nikiere przemondrzałe łyse pały - że boł to konflikt narodowościowy.

Mało kiery kaj indzi porzondnie bal kopnoć umioł, toż warszawioki co lepszych naszych brali do wojska. Każdy ślonski fuzbaler boł sie isć do stowki, bo mog już tam dostać order do woja. To niy były żodne transfery, jak mydloł oczy jedyn ważny, ale to było prowdziwe złodziejstwo. A werbusy się z nos śmioli i bez to krew się loła, jak sie nasi z werbusami loli. Tak jak teroz, tak i tedy były teryny, na kiere strach było wlyźć. Najbardzi brynclich było przy grubie koło bykowniow; tam żoden z noszych nie łodwożył sie bez dzień pokozać, a co dopiero po ćmoku. Przy kożdej grubie okolice domow gornika to były łod werbusow i tam musieli siedzieć, bo jak sie pokozali poza bykowniami, to dostali lyjty.

*Codziennie rano najświeższe informacje z woj. śląskiego prosto na Twoją skrzynkę e-mail. Zapisz się do newslettera
I w on czas tyż były ustowki, przeważnie pod koniec muzykow. Podczas jednej taki chaji, jedyn gorolski podciep nie doł pozor, abo źle sie zasłonioł, a że łeb mioł mieńko, toż sie już nie łopamientoł. Lojzek, kiery chajok boł tęgi, też tam boł i wyszło na to, że to jego sztacheta była za twardo i biydny Alojz wylondowoł w Raciborzu. W hareszcie trzi lata siedzioł.

Ciężko wtedy Lojzikowej Trudzie było, bo dziecko sie prawie urodziyło, ale kamraty robiyli czynsto ściepy i niy musiała po fechcie chodzić. Ponboczek ło Lojzku tyż pamientoł i mu jego krzywda wynagrodzioł: w ciupie zrobioł technika i na grubie dochrapoł sie sztajgierki. Po strajkach, jako wieńzień polityczny, dostoł medale. Boł polityczny, bo zawsze jak sztachetom abo guminknyplym wywijoł, to ciyngiym pieronioł: ty rusie ty platfusie, ty gorolsko fuzlapo, ty germańcu, ty zesrańcu i jeszcze inaczy. Zawsze wiyrszym, bo boł szkolony - mioł mało matura. Werbusy tyż przeklinali, ale po swojimu: ty ku.., ty ciu... - nasi wtedy tak niy umieli, my sie dopiyro, a najbardzi dzieci, łod nich sie uczyli "nowoczesnego polskigo wyrażanio".

I jak jo, po takich przodkach, mog nie erbnonć patriotyzmu. Nie chcioł jo, ale musiołech, bo starzik z Alojzkiym by sie w grobie poprzewracali. I zostołech, jak nazywają nos pismoki, pseudokibicym i kibolem. Ale porzondni ludzie godają ło nas - patrioty.

Nikierzy wierzą pismokom, ale jak sie przyjrzeć z bliska, to sie widzi, jak je. Ciupasy łod prasy wypisują o nas pierdoły i nawołują: "kibole to ordynusy i brynole", "pseudokibicow trza uśpić"...! I potym jak takimu niy przyflancować, choć starczy by usłyszoł: "zamkni pysk pacanie" a już zmia-to pod paryzol mondurowych.

*Codziennie rano najświeższe informacje z woj. śląskiego prosto na Twoją skrzynkę e-mail. Zapisz się do newslettera
Niech ludzi niy bamoncom i piszom prowda jak je, a je tak:
- po primo, my som zorganizowani, już uzbrojeni i z wieloletnim doświadczeniem bojowym - mogymy sie jeszcze nieroz przydać,
- po drugi, my są kwiat polski młodziyży, po roztomańtych szkołach; my w sztudyrowaniu byli uparci i dlo pogłymbianio wiedzy my sie nie śpieszyli z wartkim ukończyniem szkoł. Dużo naszych po zagranicznych praktykach może sie pochwolić tytułym: "Szwarc Arbajter",
- po tri, nasi dowódcy som z familijow bioralistow, dobrze sytuowani i dobrze ustawiyni, bez to sądy sie nas nie imają i som my niyzniszczalni,
- po qwarto, my to prawdziwi patrioty, gotowi do najwiynkszych poświenceń - nie boimy sie skropić krwią pola walki.

To nieprowda, co przekazują masie media. A to same media są winne, bo nos podburzajom. Na ten przykłod, po co pokozywali, że Polokom na Litwie robiom krzywda, zamykają im szkoły, nie mogom godać po polsku, niszczą polski tabule i prześladują na roztomańte insze sposoby. Po co pokozywali, że prezydentka i premier Litwy olywajom naszego i premiera, i prezydenta. No po co?

Zapomnieli, że mają nakozane pokazywać Polsko silno, i że ludziom żyje sie dostatnio, a nawet wiency, że je miło, łatwo i przyjemnie. A te ciućmoki sie zapomnieli. Jak by my ło tych prześladowaniach nie wiedzieli, to by my na Litwa w marcu tak bojowo nastawieni nie jechali. A tak, już w wozach bojowych, w dojeździe do Kowna było słychać patriotyczne śpiewy. W marszu na boisko, z rozwiniyntymi fanami, tyż my śpiywali. Najczynści to było: "… nie bydzie Litwin pluł nam w gemba i dzieci nom łonaczoł..." i tyż: "... niechaj Polsko zno, jakich synow mo..."!

*Codziennie rano najświeższe informacje z woj. śląskiego prosto na Twoją skrzynkę e-mail. Zapisz się do newslettera
Co sie potem działo, to pismoki-najemniki skłodali na przegrany mecz z Litwinami 0:2. Bamoncili ludzi, pisali w gazecie i thetimesie, godała telewizjo, że kibole przynieśli Polsce wstyd, bo mścili sie za przegrany mecz. Co za breweryje wypisywali! Po prowdzie, to trocha nos przed meczem podhajcowali, bo trzymali nos mondurowi przed stadionem cało pierszo połowa, a potem cie-pali gaz na nasz sektor, a potym jeszcze polywali nas wodą. Ale woda naszego patriotycznego wigoru niy zagasiyła. Zaczyni my napieprzanką z policją i demolką stadionu, ale na złe im to nie bydzie, bo stadion boł ańfachowy - teraz mogom zrobić szykowniejszy.

Potym na mieście - kiery Litwin nie zabarykadowoł sie w doma - zostoł naznaczony. A że uli-ce gibciutko opustoszały, nastąpiła pacyfikacjo lokali. Goście w restauracjach ratowali sie, jak mogli, przeważnie byli pod stołami razem z porcelanom i potrawami. Jako tako wyglondały yno te szynki, kiere zastosowały zaciemniynie. Ale Kowno to przeca niy stolica i nikiere bojowe wozy już brały azymut na Wilno, jednak busy zawrocono. Niechybnie doszłoby do łostatecznego rozwiązanio kwestii litewski i dano by robota kartografom, ale z uwagi na pamieńć ło Jagielle i roku 1410, zapiskali sygnał do odwrotu.

Jo jednak musza się wycofać - mom coś niy yno z głowom. Noce mom straszne, i rano cołe łoże je mokre. Śni mi sie łostatni stadion, kaj żech boł - stadion Arena w Gdańsku i mecz łotwarcio stadionu: Polsko - Niymcy. Miała to być wielko feta ze ważnymi figurami. Mioł tyż być bardzo ważny persona i to niy som, ale z aniołym, jednak z nami patriotami zadar i sie boł być jawnie. Boł, ale inkonito. Dlo myni łoczytanych muszą dopedzieć, że inkonito to sie wziyno łod takigo piyrszego, kiedy to niechcąc być poznanym, jedyn ważny udowoł konia - stąd się godo inkonito. Ten, na Arenie w Gdańsku, wielki fan fuzbalu, łoblyk się za klosztorno panna.

*Codziennie rano najświeższe informacje z woj. śląskiego prosto na Twoją skrzynkę e-mail. Zapisz się do newslettera
I ta Arena mi się śni.... Jakiś beboki trzymajom mie pod parza i pływomy w lufcie we mgle dziwnym tunelym. Z jednej strony szklano ściana z widokiem na boisko. Widza, że grajom. Słysza, że wrzeszczą, ale stadion jakiś dziwny, som beton, bez ludzi, bez fotelikow. A z drugi strony tunelu same dzwiyrze, a na każdych tabulka z roztomańtymi sądami: sąd elektroniczny, sąd powolny, sąd bezławnikowy, sąd 24-godzinny, sąd asesorski, sąd prawomocny, sąd przewlykany, sąd zależny, sąd niezależny, sąd bogatych, sąd wyrozumiały, sąd biedoty, sąd bezlitosny...

Potem dzwiyrze z tabulką: łobroże i tam mie wciepli. Chciołech stanoć, ale na karku znod się obujek i cienżki lańcuch, a beboki smyczom mie i smyczom, po czwor nog, po tym strasznym tunelu, na końcu kierego poszczotku zwyrtajonce światełko, a z niego robi się wiynkszy i coroz wiynkszy, wielki łobroz ze zakonnicą. Kiedy już klosztorno dzwigo rynce by ściepać kaptur i pokozać gymba, jo sie budza.

Kamraty na mie krzywo sie boczom, bo myślom, że sie deku-ja i zmyślom. Jo sie dekuja, jo? Jo, kiery niyjedyn roz krew puścioł i po kobylicy dostoł. A roz, kiedy na ustowce dostołech gumilań-cuchym, choć było ugodane, że żodnego metalu niy używomy, było zy mnom na dwoje. Dochtor tyż z poczontku godoł, że fan-tazyruja, ale jak mie zakludzioł do hipnotyzynera, to uwierzoł i tera godo inaczy. Godo, że musza czakać, bo wszystko sie skończy jak klosztorno przestanie być inkonito. Ale jo tego moga niy wytrzymać, moga łogupnoć... Może mi fto pomoże i powi: fto to je?

Henryk Kula, gotartowianin z Żor

CZY ZGADZASZ SIĘ Z AUTOREM LISTU? KONIECZNIE NAPISZ SWOJĄ OPINIĘ

*Codziennie rano najświeższe informacje z woj. śląskiego prosto na Twoją skrzynkę e-mail. Zapisz się do newslettera