Wielgonoc po naszymu. We Wielgo Sobota idzie dziołszka ze koszyczkym

Pora lot nazot byłech we Niydziela Palmowo we kościele pw. Dobrego Pasterza w Ustroniu Dobce, to je tam kaj farosz rajtowoł na yjzlu, na fynsterbrecie leżała tam piykno palma, chciołech jom knipsnyć, ale niy miołech ze sobom aparatu, a szkoda. Była to tako palma, jako jo i inksze synki robili downo tymu.

Do palmy dowało sie po trzi prontki, kocanki, lyski, kściny, kaliny i ku tymu nikierzi dowali astki jałowca, a jedyn to doł astki jymioły, a to było łowiniynte czerwonymi prontkami wiyrzby, abo szpagatym.

Zrobiłech tako palma niydowno, moja baba jom łobejżała i pedziała co ze mietłom do kościoła niy pudzie, wziyna z nij kocanki, dołożyła ku nim kupno palma ze farbionej trowy, pora astek lebensbaumu, swionzała szpagatym i miała palma fertich.

Bo moda na palmy tysz sie zmiynio, jeszcze za Gierka jedna dziołcha prziszła poświyncić do starego kościoła we Bełku jedna chłabina ze palmy daktylowej, ale to był jedyn cufal. Tera modne som palmy kupne tz. wileńskie, za dwa trzi złotki kupuje sie palma i niy trza zbiyrać prontkow po polach i lasach.

Przed Wielgomnocom momy Wielgi Piontek, matka godała, co wczas rano trza sie umyć we rzyce abo żdzodle, ale jeszcze niy miołech sposobności do teraska.

Kole 60 lot nazot byłech u ciotki Wandy we Grobnikach wele Głubczyc, na śniodanie jodłech pelkatofle i słonego harynka ze beczki i to było wszysko na cołki dziyń.

We Wielgo Sobota pacza na droga, a tam co chwila idzie dziołszka ze koszyczkym przikrytym biołom chusteczkom ze krałskami, pytom sie kuzyna kaj to idom, a łon godo to repatrianty idom do kościoła poświyncić jodło, łoni wszysko świyncom. Jo sie padoł, jodło dowo Ponbog to go niy trza świyncić, ale jak pamiyntom matka tysz robiła na pecynku chleba trzi krziżyki zanim ukroła skrowek. Dzisio jodło świyncom niy yno repatrianty, bo we Bełku farosz świynci pora razy i za kożdym razym kościoł je fol pełny.

Przed Świyntami trza wyszkrobać uszy, to znaczy farosz wyszkrobuje uszy jak sie idzie do spowiedzi do słuchatelnicy, we Hermanicach na tabulce szrajbujom spowiednicy.

A we chałpie trza pucować łokna, wiyszać nowe gardiny, wyndzić szinki woszt, piyc kołocz, ciasta szykować jajca we zalywie ze szałupin cebule i kminku, robić kroszonki.

Bes świynta wiadomo, trza iść porzykać do kościoła, kościoł je fol pełny bo nikierzi idom tam roz na rok. Bajtle najbardzij radujom sie na Zajonczka abo Hazoka, kiery przinosi maszkety do gniozda pod krzok johanysberow, abo wiepszkow, we robocie mi sie przytrefiło co Hazok zrobił gniozdo na moim, komputerze tak sie tyn świat miyni. Wieligo Hazoka przinosi tysz szac sfojij lipście.

Drugi Świynto momy Śmiergust jedni kropiom dziołchy i baby parfinym, a inksi gupiejom ze cołkimi kiblami wody.

Krzysztof Gilecki