Buchalik: Budzi sie Irek, budzom sie Górniki...

Biyda znolyź jeszcze lepszo okazjo do spamiyntanio sie jak szpil u sia z Widzewym. Ekipa z Łodzi na wiosna na dyć jeszcze niy wygrała. W tych sztyrech ostatnich szpilach szczelili ōni yno jednego gola. Co prowda synki z Zabrzo w ostatnich spotkaniach niy wyglōndali wiela lepij, ale tabela sztyjc godała nōm ewidyntnie kto o co gro w tym sezōnie.

CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL

Mono jednak przidzie latoś wiosna. Na razie piyrszōm nij oznakōm jes przebudzōny Jeleń. Były gwiazdor Ligue 1 po roz piyrszy obroł cyl na bramka Krakowiaka już w 17. minucie. Wtedy bal pofurgnōł jeszcze w pierōny, ale 7 minut niyskorzij było już dużo lepij. Po dobrym zagraniu Kwieka, bal na 20 metrze od bramki dopod właśnie Irek i bez namysłu kopnōł z lewej nogi po długim rogu. Torman ni mo samek wiela do godki. Bal lōnduje gynał pod prawym słupkiym. 1:0.

ZOBACZ KONIECZNIE:
BUDOWA STADIONU GÓRNIKA WCHODZI W NOWY ETAP [NAJNOWSZE ZDJĘCIA]

Ostatnigo ligowego gola Jeleń szczelōł jeszcze w barwach OSC Lille, potym po przekludzinach do Bielska-Białej i teroski do Zabrzo niy szło mu nojlepij. Gol po telkij przerwie, bōł fest ważny tak do niego jak i do cołkij drużyny, kiero w kōńcu sie obudziyła i poszła za szlagiym.

Już w 30. minucie bydymy mieli nastympny powōd do uciechy. Do bala ustawiōnego za 30. metrym od bramki podlezie Aleksander Kwiek. Po jego szlagu futbolōwka odbije sie od zola, gynał przed bramkorzym i poleci zaś pod prawy słupek. Szpetny bal do obrōniynio. Krakowiak zaś niy poradziōł uratować gości i było 2:0.

Widzewioki do porzōndku ruszyli do przodku dopiyro po przerwie. Groźne akcje prziniōsły efekt w 50. minucie. Bohatyrym akcji jes wtedy wkludzōny na boisko pod kōniec piyrszej czynści gry, Bartłomiej Pawłowski. Grocz Widzewa dostowo od kolegi bal na dwadziestym metrze, tamek robi se jednego obrōńcy i trefio w lewy dolny rōg bramki.

Górnik poszterowany golym kōntaktowym gości, na wiela wiyncyj już im w tym szpilu niy pozwolōł. Teroski to synki z Zabrzo ewidyntnie przewożali. Zasłużōne zwyciynstwo gospodorzy potwierdziōł w 64. minucie Adam Danch. Po cyntrze z roga młody Hanys trefiōł do siatki szlagiym głowōm na długim słupku.

Widzew niy bydzie w stanie już nic samek zmiynić. Górnik w kōńcu zgarnie kōmplet punktōw i chocioż na chwila wrōci nazot na ekstraklasowe podium. Mōno jeszcze dadzōm nōm w tym sezōnie trocha uciechy.

Górnik Zabrze - Widzew Łódź 3:1 (2:0)
Bramy: Ireneusz Jeleń (24.), Aleksander Kwiek (30.), Adam Danch (64.) - Bartłomiej Pawłowski (50.).
Górnik: Łukasz Skorupski - Paweł Olkowski, Adam Danch, Bartosz Kopacz, Mariusz Magiera - Prejuce Nakoulma (80. Bartosz Iwan), Mariusz Przybylski, Aleksander Kwiek, Krzysztof Mączyński, Wojciech Łuczak (81. Tomasz Zahorski) - Ireneusz Jeleń (70. Grzegorz Bonin).
Widzew: Maciej Krakowiak - Michał Płotka, Thomas Phibel, Dino Gavric, Łukasz Broź - Marcin Kaczmarek, Radosław Bartoszewicz (46. Mariusz Stępiński), Hachem Abbes (72. Veljko Batrovic), Sebastian Dudek, Denis Kramar (40. Bartłomiej Pawłowski) - Princewill Okachi.

PODOBA CI SIĘ BLOG GRZEGORZA BUCHALIKA? NAPISZ KOMENTARZ

Grzegorz Buchalik, student z Żor, uwielbia grać w piłkę i relacjonuje po śląsku mecze ekstraklasy. Ślōnski fusbal ma udowadniać, że język śląski to nie tylko żarty, co nie znaczy, że żartów musimy usilnie unikać. Ślōnski fusbal ma przede wszystkim promować śląski język i sport. Teksty adresowane są nie tylko do Ślązaków, dla których godka jest językiem ojczystym, wyniesionym z domu. Grzegorz Buchalik pisze alfabetem łacińskim z tym, że dodaje jedną literę-samogłoskę, zapisywaną jako: ō (jak np. w wyrazach kōnsek", czy pozōr).

*Strajk generalny 26 marca w woj. śląskim
*Bandycki napad na sklep w Mysłowicach ZOBACZ WIDEO
*ZOBACZ luksusowe samochody prezydentów miast. Po co im to? ZOBACZ ZDJĘCIA
*Serial Anna German [STRESZCZENIA ODCINKÓW]