Buchalik: Ruch-Podbeskidzie, czyli jeszcze niy po ptokach...

CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL

Spotkani w Chorzowie to yno mały kōnsek z serii ,,szpilōw o życi" jaki chyba do kōńca sezōnu bydōm rozgrywać grocze Podbeskidzio. Ruch jednak tyż groł o coś wiyncyj niż przisłowiowo ,,czopka śliwek". Zwyciynstwo oprócz satysfakcji z dobicio przeciwnika, pozwolyłoby im zaś odskoczyć od strefy spadkowej i dałoby im na doś pora kolejek spokojny ligowy byt, nawet na trocha wyższym placu. Podbeskidzie pokozało jednak gospodorzōm, że to niy C-klasa i tukej coby zdobywać punkty trza tyrać na pełnym szwōngu cołki spotkani. Co wiyncyj nikiedy przidowo sie tyż umiyjyntność dokładnego podania do kōmpla z drużyny na odlygłości poru metrōw.

Szpil zaczyno sie do gospodorzy niy nojlepij. W 11. minucie szlag Sokołowskigo rynkōm w swojij szosnostce zatrzimuje Stawarczyk. Hneda tyn piyrszy dostowo okazjo do poprawiynio z jedynostego metra i tym razym idzie bez problymōw.
Spotkani rozfechtowało sie do porzōndku w kōńcōwce piyrszej połowy. Drużyny grały szlag za szlag. Lepsze okazje mioł jednak Ruch. Nojgroźnij było na 5 minut przed kōńcym. Bal zagrany z środka pola przifurgnōł pod nogi Jankowskigo. Napastnik Ruchu zrobiōł se przeciwnika i już dogrywoł do środka, kaj akcjo mioł wykōńczyć durś niywachowany Janoszka, ale zagrani zostało przeciynte. Bal niy trefiōł do adresata, kiery w myślach mōg już dedykować gola jakijś szwarnej freli. Niystety... Do przerwy 0:1.

Jak piyrszo połowa zaczła sie do Ruchu źle, tak drugo jeszcze gorzij. W 49. minucie na bramka Peskovicia szczyloł Chmiel. Torman poradziōł odbić bal, ale zawsze ,,wrazidlaty" Robert Demjan znod sie tam kaj mioł być i dobitkōm wykludziōł gości na 2:0.

Ruch próbowoł, ale za pierōna niy szło mu pod bramkōm gości. Mono beztōż zdecydowoł sie im pōmōc Demjan, bo to właśnie ōn bōł nojbliżyj wrażynio bala do siatki bramki Zajaca. Interwyncjo snajpera Podbeskidzio po cyntrze z roga musiała fest wylynkać tormana, bo bal po nij yno o cyntymetry minōł słupek.

Gol kōntaktowy jednak wpod. Zaś zagrożyni prziszło z roga. Tym razym ,,Niebiescy" poradziyli se jednak sami. Po cyntrze Starzyńskigo szlag głowōm oddoł Zieńczuk, a źle słupka wachowoł Dariusz Łatka. Ostatecznie bal jes w siatce i mōmy 1:2.
Pojawiyła sie szansa do gospodorzy, ale hneda ōni sami z nij zrezygnowali. Kōnkretnie rozchodzi sie o zagrani Arkadiusza Lewińskigo. Jego próba dogranio do bramkorza lepij zostawić bez kōmyntarza. Ausdruka obrōńcy wykorzystuje Demjan, kiery zaroski tyż spokojnie zdobywo swojigo 10. gola w sezōnie.

Niy do sie ukryć, że eksperymyntalny skład defynsywy ,,Niebieskich" niy zdoł egzaminu. W przodzie jednak gospodorze tyż za fest niy pogupli i w efekcie zostali bez punktu. Kibice ofyn wyryczeli, że jes im gańba za swoich groczy, a trynera Zielińskigo nojchyntnij potraktowaliby jak Jagna z ,,Chłopōw" - na kara i wywiyź do ,,Pierōnowic". Yno czy to coś do?

Podbeskidzie zaś chyto w płuca trocha luftu i jeszcze niy zgadzo sie na degradacjo. Po szpilu wskakuje nazot na przedostatni 15. plac, ale do 14. Ruchu sztyjc traci niymało, bo aż 7 punktōw. Bal jednak dalij w grze...

Ruch Chorzów - Podbeskidzie Bielsko-Biała 1:3 (0:1)
Bramy: Marek Zieńczuk (88.) - Marek Sokołowski (11. - elwer), Robert Demjan (49. i 90.+3)
Ruch: Michal Peskovic - Żeljko Djokic, Arkadiusz Lewiński, Piotr Stawarczyk, Robert Chwastek - Marek Zieńczuk, Marcin Malinowski (53. Grzegorz Kuświk), Filip Starzyński, Mindaugas Panka, Łukasz Janoszka (67. Jakub Smektała) - Maciej Jankowski.
Podbeskidzie: Richard Zajac - Marek Sokołowski, Dariusz Pietrasiak, Bartłomiej Konieczny, Tomasz Górkiewicz - Damian Chmiel, Dariusz Łatka, Marko Cetkovic (69. Fabian Pawela), Adam Deja (73. Michal Piter-Bucko), Piotr Malinowski (89. Mateusz Janeczko) - Robert Demjan.

Grzegorz Buchalik, student z Żor, uwielbia grać w piłkę i relacjonuje po śląsku mecze ekstraklasy. Ślōnski fusbal ma udowadniać, że język śląski to nie tylko żarty, co nie znaczy, że żartów musimy usilnie unikać. Ślōnski fusbal ma przede wszystkim promować śląski język i sport. Teksty adresowane są nie tylko do Ślązaków, dla których godka jest językiem ojczystym, wyniesionym z domu. Grzegorz Buchalik pisze alfabetem łacińskim z tym, że dodaje jedną literę-samogłoskę, zapisywaną jako: ō (jak np. w wyrazach kōnsek", czy pozōr).

*Strajk generalny 26 marca w woj. śląskim
*Bandycki napad na sklep w Mysłowicach ZOBACZ WIDEO
*ZOBACZ luksusowe samochody prezydentów miast. Po co im to? ZOBACZ ZDJĘCIA
*Serial Anna German [STRESZCZENIA ODCINKÓW]