Buchalik w blogu Ślonski fusbal: Po cimoku, coby sie niy mierzło

Na polskich boiskach było w tym tydniu pierōnym "światowo" i niy godōm samek yno o wizycie fusbalistōw z Urugwaju w Gdańsku. Do Warszawy, kaj groł nasz Górnik zjechało sie pōł Europy. Goście z rozmańtych czołowych klubōw europejskich chcieli sprawdzić z bliska forma poru naszych fusbalistōw. W stolicy, jednak niy od dzisiej majōm problymy z organizacjōm ważnych szpilōw. Jak już niy kidze z dachu, to zaś odcinajōm im sztrōm...
Czego sie niy robi coby kibicōm sie niy mierzło? Na szczynści ciekawe rzeczy dzioły sie tyż na murawie i to niy yno w tym spotkaniu.

Ekstraklasa

"Po cimoku"
Przed sezōnym żodyn by sie niy spodziywoł, że spotkani Polonii i Górnika bydzie szlagrym, na kiery zjedzie sie aż tela obserwatorōw. Szpece z 20. znanych ekip m. in. Manchesteru, Interu, Milanu, Juventusu, Borussii, Bayernu, czy Olympique’u Marsylii prziglōndali sie fusbalistōm obu ekip (z Górnika nojbardzij interesowoł ich Arkadiusz Milik, Prejuce Nakoulma i Łukasz Skorupski).

Warszawa jednak zaś przi takij okazji poradziyła narobić se gańby skuli problymōw organizacyjnych. Tym razym kieryś przicis niy tyn szalter i zagasiōł im światło. Jak w starym wicu: niż kieryś prziszoł z ,,kiblym sztrōmu" minyło ponad 1,5 godziny. Zmarzniyntym kibicōm zmierzło sie w kōńcu przytulani sie do sia i zaczyły sie gwizdy.

W kōńcu zaczyli. Lepij w opóźniōny szpil wleźli fusbaliści ze Ślōnska. To ōni przekludziyli w piyrszej połowie pora rychtyk groźnych akcji. Wynik mōgli otworzyć Nakoulma, Kwiek, Milik i Olkowski. Żodyn jednak niy poradziōł pokōnać Przyrowskigo. Gospodorze próbowali yno pora razy odpedzieć z kōntry, ale tyż nic z tego niy było.

Wiyncyj mogiymy za to pedzieć o drugij czyści spotkanio. Hneda po piyrszym gwizdku elegancko akcjo złōnaczōł Górnik. Po cyntrze z prawego skrzidła i zgraniu bala głowōm w szesnostku gospodorzy, na szlag z woleja decyduje sie Kwiek. Torman ni mioł by nic do godki, kieby niy uratowała go lata. To mōg być szwarny gol.

W 52. minucie niy trza było za to piyknych akcji, ani szlagōw. Styknōł yno mały cufal. Przi cyntrze Olkowskigo spod samej linii kōńcowej, mōmy mały rykoszet. Bal odbity od Kokoszki chyto kurs na długi słupek i tamek przekraczo linia bramkowo. 0:1.
Długo z przewogi my jednak uciechy ni mieli. Sztyry minuty niyskorzij gospodorze majōm wolny. Po cyntrze bal zgrany przez Kokoszki dostowo Dwaliszwili, kiery z bliskij odlygłości wrażo go do siatki gynał pod prawym słupkiym.

W 65. minucie Magiera pod swojōm bramkōm wycino Brzyskigo rowno z zolym. Bez godki, ewidyntny elwer, ale i tak jes swada... Wadzōm sie fusbaliści Polonii. Choby na meczu trampkorzy, niy wiadōmo kto mo szczylać. W kōńcu tym, kiery zmarnowoł czworty jedynostek Polonii w sezōnie zostoł Teodorczyk. Po obrōnie Skorupskigo, jego próba dobitki szkopyrtkōm to już darymny futer.

Żodyn z wyniku niy bōł rod, beztōż szpil sie trocha rozfechtowoł. Wiyncyj do godki mioł Górnik, ale wynik już sie niy zmiyniōł. W tabeli wiynkszych zmian te spotkani tyż niy prziniōsło. Do Legii, kiero jes na piyrszym placu, Górnik traci już 6 punktōw, Polonia 3.

Piast niy dowo sie spamiyntać Podbeskidziu
Podbeskidzie musi teroski szukać punktōw kaj sie yno do, bo jak na razie tak jak w ich prziśpiywce ,,idzie idzie (…)", ale idzie na spadek. W Gliwicach goście ni mōgli sie yno brōnić i tak tyż niy było. Jednak z Piastym w tym sezōnie żodyn ni mo lekko. Tydziyń tymu przekōnoł sie o tym Mistrz Polski, Śląsk Wrocław, kiery przegroł u sia z ślōnskim byniaminkiym 1:3.

W piyrszej połowie zdało sie, że bardzij na zdobyciu gola zoleży Podbeskidziu. To, że im sie to niy udało jes fest wielkōm zasługōm gliwickigo tormana, Treli. Okozywoł sie ōn lepszy w sytuacjach sōm na sōm z Robertym Demjanym i Krzysztofym Królym. Co prowda bal wpod do jego siatki w 20. minucie, ale wtedy gynał Demjan bōł na spolōnym.

Gola mōg sieknōnć za to Piast. Wojciech Kędziora poradziōł minōnć bramkorza, ale jego szlag wybiōł z pustej bramki Król. Tyn sōm grocz mioł jeszcze jedna okazjo zaroski po przerwie. Wtedy po szlagu Rubena Jurado, jego dobitka niy poleciała jednak ani w światło bramki.

Za chwila zamloło sie po drugij strōnie. Ireneusz Jeleń dostowo elegancki prostopadły bal z głymbi pola i wyłazi na sōm na sōm. Na pełnym szwōngu mijo tormana i kieruje bal do bramki. Były snajper reprezyntacji Polski zaś ni mo szczynścio. Jedyn z obrōńcōw w ostatnim mōmyncie robi ,,wyjazd".

Teroski ciynżor gry przeniōs sie pod bramka Zajaca. Efekt atakōw Piasta oglōndalimy w 81. minucie. Przi cyntrze z lewego skrzidła obrōńcy niydowachowali Rubena Jurado. Hiszpan głowōm pokierowoł bal do siatki pod prawym słupkiym. Za jednym szlagiym otwar i ustalōł wynik szpilu.

Podbeskidzie już sie niy spamiyntało. Mono tym razym ich gra niy była nojgorszo, ale niy zmiynio to faktu, że ich sytuacjo w tabeli prezyntuje sie darymnie (przedostatni plac i 6 oczek straty do nastympnego w tabeli Lubina). Synki z Gliwic dźwigajōm sie za to na pozycjo numer 7.

Czasy Waldka niy wracajōm
Kaj sōm te wyniki? Odkōnd Ruch straciōł Waldka Fornalika niy umi sie spamiyntać i grać swojigo fusbalu z tamtego sezonu. Tym razym na zakōńczyni kolejki ,,Niebiescy" zaliczyli niyudany wyjazd do Szczecina, kaj przegrali z byniaminkiym 1:0.

Z piyrszej połowy werci sie spōmnieć yno akcjo bramkowo. W 23. minucie fusbaliści Ruchu tracōm bal w środku pola i za chwila wartko kōntra golym kōńczy Adam Frączak. Do przerwy Pogoń już yno kōntrolowała sytuacjo. Ruch wiela niy wymyślōł.

Nazot na murawa nasi wyleźli w trocha inkszym składzie. Zieliński wkludziōł Grzegorza Kuświka i Jakuba Smektały. Tych dwóch synkōw trocha rozruszało gra. Ruch pora razy mōg wyrownać, ale to jednak niy bōł ich dziyń. Przody Filip Starzyński klupnōł z wolnego w lata, a dobić w sytuacji sōm na sōm niy poradziōł Jankowski. Niyskorzij akcjo tego drugigo z Arkadiuszym Piechym wykańczoł Kuświk, ale bal po jego próbie zabezpieczōł torman Pogoni.

Kōniec spotkanio. Ruchowi, kiery dalij mo fol groczy na rewiyrze, ewidyntnie niy idzie ostatnio nojlepij. Nasz wicemistrz Polski jes dopiyro na 12. placu w tabeli. To ni ma pozycjo dō nich. Mōmy nadziejo, że hneda sie poprawiōm, bo niy chcymy sam kōmyntować ich walki o utrzimani.

I liga

Rozklupani na wszyjskich frōntach
Zero punktów i yno jedna hōnorowo bramka. Tak wyglōndo bilans ślōnskich piyrszoligowcōw w ostatnij kolejce rozgrywek rundy jesiynnej. Jakby sie niy dziwać - darymnie. Do porażek Polonii Bytōm zdōnżylimy już sie przyzwyczaić, beztōż bardzij liczylimy na punkty naszych GKS-ōw. Niystety, niy tym razym.

W sobota o jednej po połedniu zaczōł sie szpil w Łęcznej. Tamek przijechała naszo nojlepszo piyrszoligowo ekipa, GKS Tychy, kiero mielimy za faworyta tej rozgrywki. Dyć po ostatnij serii 4 wygranych spotkań Tychy zaczły sie nawet liczyć w walce o awans. Kożdo serio kiedyś sie jednak kōńczy. Do przerwy utrzimywoł sie jeszcze wynik bezbramkowy. Za to w drugij czynści spotkanio gole Michała Zubera (51. min.) i Michała Renusza (83. min.) ofyn pedziały nōm kto samek zebiere 3 punkty. Tychy i tak przezimujōm na wysokim 5. placu, chyba że po rozegraniu zaległego szpilu przeskoczy ich inkszy byniaminek, Miedź Legnica.

W sobotni wieczōr groł jeszcze nasz niydoszły i potyncjalnie prziszły drugoligowiec, Polonia Bytom. Wyjazd do Bydgoszczy bōł dō nich pierōnowo trudnym zadaniym i niy rozchodzi sie samek o problymy na trasie skuli niydokōńczōnej przez Chińczykōw autobany A1. Ekipa z Bydgoszczy gro o awans i ni mōgła pozwolić se na strata punktōw z ostatniōm w tabeli Poloniōm. Po 45. minutach, po golu Piotra Petasza gospodorze kludziyli 1:0. W drugij połowie wartki dwie bramki Kamila Drygasa z 60. i 65. minuty ,,pozamiatały" ta rozgrywka. Synki z Bytōmia poradziyli jeszcze wrazić bal do siatki gospodorzy w 83. minucie. Gol Krzysztofa Michalaka to jednak już yno trefiyni hōnorowe. W tabeli ni mo kto Bytōmiokōw przeskoczyć, beztōż nic sie niy zmiynio.

Trzeci wyjazd i trzecio przegrano mogiymy dopisać do statystyk naszych piyrszoligowcōw po niedzielnym szpilu GieKSy. W Ząbkach nasi zebrali lekko fanga w zymby i jadōm du dōm z dwōma bramkami w pleca. Katym Katowic okozoł sie Mateusz Piątkowski. Grocz Dolcanu nojprzōd po godzinie gry otwar wynik spotkanio, a kej bez nastympne pōł godziny nasi niy wykōmbinowali żodnego knifu na wyrownani, tyn sōm fusbalista sieknōł na 2:0 i było pogodane. W tabeli trocha sie zafyrlało i teroski to Dolcan wyprzedzo GieKSa o jedne oczko. Nasi sōm na 13. placu.

Grzegorz Buchalik
www.silesiansport.pl

CZYTAJ KONIECZNIE
BLOG GRZEGORZA BUCHALIKA ŚLONSKI FUSBAL*Zniewalający wystrój restauracji Kryształowa Magdy Gessler ZOBACZ ZDJĘCIA i WIDEO
*Wszystkie barwy Niepodległości w obiektywach reporterów Dziennika Zachodniego ZDJĘCIA
*Euforia na koncercie Kultu w Spodku [ZDJĘCIA i WIDEO]