List do DZ: Dojś, niy grom dali...

Jak moja społka splajtowoła

Dobrze, że tyn 2013 rok momy już za sobom - skuli tej trzynostki boł dlo moji społki pechowy. Splajtowoła, bo szlak jom trefioł skuli złodziyjstwa. A szkoda, bo boła to firma familijno, kero założyli jeszcze nasi łojcowie, a my - to je jo, szwagier, kuzyn Tonio i jego szwiger - yno jom przejyni i u notara podpisali. Nasi łojcowie notara niy potrzebowali, ale my woleli mieć wszycko po nowymu.

Piyrsze jaskołki kryzysa

Trza tyż pedzieć, że łoni łopiyrali się ło Karolinka, kero boła robiono na Ślonsku, a my ło Totolotek, kery je we Warszawie. Latami my jom mieli i choć moc profitow niy boło, a po prowdzie to my dopłacali, to jednakowoż swoje my wiedzieli, iże jak latami niy padły nosze nomery, to coroz bliży my som wielki wygranej, bo przeca kejsik muszom paść. Aż tu szwager, jak przyjechoł ze sanatoryjow, pedzioł: dojś, niy grom dali, wielki wygrane złodziyje we Warszawie kradną - koniec, niy byda ich kormioł. Nad tym morzym tak mu łepą zaszelontali, że nijak nic mu niy szło erklarować.

Piyrsze jaskołki kryzysa furgały już koło naszyj społki na wiosna, kej to sztelowali my dzwignonć pula kapitałowo. Szwiger Tonia liczoł na rewaloryzacyjo penzyje i że bydzie kapitałowo tak jak rok nazod i kożdy dostanie po rowno - dostoł wtedy każdy pynzyjista jakiś 70 złotkow. Przi procyntowyj to bogaci dostaliby po 200 zł, a biydny 30 zł. Kożdymu się zdowo, iże po rowno, to je po ludzku; kożdymu, ale niy rzondowym we Warszawie. Bogaci jednak deptali za tym, by była rewaloryzacyjo procyntowo i tako tyż rzond rozkozoł, by była. Choć szwiger liczoł, iże jeszcze coś zmiyniom jak Trybunał pedzioł, iże po rowno, to je zgodne ze wszyjskim. Nic się niy zmiyniyło - szwiger pieronioł, ale jak i na kogo, to niy naszkryflom, bo niy chca grzeszyć i inszym grzychu robić. Tonio szwigrowi pomog, toż sie niy wycofoł i interes wiydli my dali.

Gańby ni majom

Szwigra sie udało ucholkać, jednak ze szwagrym poszło gorzij. Zwołali my sie jako akcjonaryjusze w pełnym sztyroosobowym komplecie i sztelowali, co dali. Jak szwager zaczon godać, co się tam w tym sanatoryjum dowiedzioł, to i nom w gowach poprzestawioł. Zaczon łod tego, iże na złodziyjstwo, kere teraz mianują korupcyjom abo pitraszynim, przymyko sie oko i habjom w najwyższych władzach. Bierom wielge milijony, ale i co popadnie, ancug abo zygarek - gańby ni majom. Ciepoł mianami, ło kerych my niy słyszeli. Faronioł łogromnie, iże jak już majom zło-dziyje piniondze, to sie wykupujom i siedzieć niy idom.
Godoł ło jenerałach, ministrach i dygnitożach wszelaki maści. Erklarowoł tyż nom, co to takigo te pitraszyni, bo to je nowszy sposob, trza yno iść do firmy i pedzieć, iże zrobi sie jim eksper-tyzyjo abo co bądz inszego niy-potrzebnego za miliony i ugodo z kim bydzie dzieleni piniyndzy.

Mocka złodziyji pozamykać niy idzi, bo ni ma procedury. We Warszawie jedyn ważny wzion piniondze ze skodek, bo się chcioł biydok przyłodzioć - nic mu niy zrobiyli, bo szukali procedury i niy znodli. U nas, kej procedury nie znod Izydor ze Grajdołka, toż hareszt go niy minoł, skyrs tego, iże podbiyroł piniondze ze skłodek gołym-biorzy. Tyn Procedura to musi być pieronym ważno figura i szkoda, iże sztyjc go ni ma.

Jak goronczka łopadła

Niy idzie pojonć, by wielge wygrane w totolotku przed złodziyjami sie łobstoły. Jak goronczka z nos łopadła i jak mosz trocha ciongoty do gyszeftu, to cie do niego ciongnie, bezto łobszte-lowali my na nowo założyć społka i interes robić abo we Niymcach, abo na Białorusi - isto jednak na Białorusi, bo we Niym-cach je za drogo.

Piniondz na poczontek bydzie, bo sprzedomy nasze szostki, kiere 20 lot granio milionow niy przyniosły. Keryś je kupi bo im dali w czasie tym do milionow bliży. Gromy dali, ni mogom nom marzyń ukraść - tego bołoby już za wiela!

Henuś Qla
/opr.JJ/

CZYTAJ WIĘCEJ LISTÓW DO REDAKCJI DZIENNIKA ZACHODNIEGO

Nasz adres: "Dziennik Zachodni" Media Centrum, ul. Baczyńskiego 25a, 41-203 Sosnowiec
Adres mejlowy: [email protected]

*Filmy erotyczne z początku XX w. to nie porno, a sztuka ZOBACZCIE
*Głośni Ludzie 2013 Roku woj. śląskiego [ODDAJ GŁOS W PLEBISCYCIE]
*Abonament RTV 2014 [OPŁATY, TERMINY, ULGI]
*Orszaki Trzech Króli idą przez nasze miasta [ZDJĘCIA + WIDEO]